27 верасня ў чытальную залу Бібліятэкі сямейнага чытання вілейчане завіталі на творчую сустрэчу з Міколам Шабовічам І Віктарам Мяцельскім “Я да цябе прапісаны, мой край”.

Творчы саюз беларускага паэта, кандыдата філалагічных навук, дацэнта кафедры беларускага мовазнаўства БДПУ імя Максіма Танка Міколы ШАБОВІЧА з выдатным лірычным выканаўцам бардаўскай песні, кампазітарам, прафесійным мастаком  Віктарам Мяцельскім падарыў усім прысутным незабыўныя імгненні  асалоды ад паэзіі і музыкі.

Мікола Шабовіч — паэт, які доўгі час радуе сваіх чытачоў вершамі, многія з іх пакладзены на музыку і расквечваюць наша жыццё як песні. Ён здольны падняць настрой вытанчанай сатырай і гумарам, напісаў масу пародый.

Кожны прысутны ў зале атрымаў асалоду ад чароўнага перараджэння вершаў у музычны твор пад гукі гітары Віктара Мяцельскага – кампазітара, які словы і ноты злучае ў бязважкія карункі  песні.

Нават пасля развітання ў сценах біліятэкі ўсё яшчэ лунала музыка і словы любові да роднага краю і беларускага слова.