26 лютага 2016 года на базе Гарадскога філіяла №1 адбылося паседжанне літаратурнай гасцёўні “Дамінанта душы” пры Вілейскім тэрытарыяльным цэнтры сацыяльнага абслугоўвання насельніцтва пад кіраўніцтвам Антаніны Іванаўны Гарчаковай. Тэма паседжання – абмеркаванне твора “Цынкавыя хлопчыкі” Нобелеўскай лаўрэаткі 2015 года па літаратуры Святланы Алексіевіч. На паседжанне былі запрошаны ветэраны, удзельнікі Афганскай вайны Кронда Уладзімір Аляксандравіч і Сакаленка Валерый Васільевіч, якія падзяліліся сваімі ўспамінамі з прысутнымі, далі сваю ацэнку тым падзеям. Уладзімір Кронда пад гітару праспяваў некалькі песен на ваенную тэматыку. На сустрэчы таксама прысутнічаў член Саюза беларускіх пісьменнікаў Цанунін Уладзімір Іосіфавіч, які прачытаў свае вершы і праспяваў свае песні. Бібліятэкар Святлана Мялешка распавяла біяграфію Святланы Аляксіевіч, а таксама пазнаёміла з шэрагам твораў пісьменніцы.

29 студзеня 2016 года Крывасельская СБ і клуб правялі літаратурную вечарыну “Чалавек вялікай душы і таленту” (І. Шамякін), на якую былі запрошаны чытачы бібліятэкі і вучні 5-9-х класаў. Успаміны Івана Шамякіна агучылі бібліятэкар Крывасельскай СБ Ракецкая Л. М. і загадчыца клуба Шаблыка А. М., гучалі беларускія народныя песні, таксама была праведзена віктарына па творчасці пісьменніка. Прысутныя мелі магчымасць пазнаёміцца з цікавымі фактамі біяграфіі пісьменніка. Гледачам была прадстаўлена кніжная выстава твораў пісьменніка.

У рамках Года культуры 28 студзеня ў раённай бібліятэцы прайшоў біяграфічны экскурс “Натхненне і майстэрства” да 95 – годдзя з дня нараджэння таленавітага беларускага празаіка Івана Шамякіна. Была падрыхтавана кніжная выстава “Талент на пульсе часу”. Прысутныя даведаліся пра факты з жыцця пісьменніка, побыт і традыцыі ў сям´і, характарыстыку яго як чалавека, бацькі, сябра, грамадзяніна і яшчэ шмат цікавых фактаў з успамінаў яго дачкі Таццяны, апублікаваных ў часопісе “Белая Вежа”. У канцы мерапрыемства быў праведзены абзор твораў майстра пяра.

22 студзеня ў выставачнай зале імя Н. Сілівановіча прайшла прэзентацыя кнігі Клаўдзіі Дубовік “Багданава – вёска нашага дзяцінства”, арганізатарамі якой з´яўляліся супрацоўнікі ДУК “Вілейская раённая цэнтральная бібліятэка імя Ганны Новік”. На імпрэзу былі запрошаны землякі паэткі, сябры, прадстаўнікі ўлады, вядомыя людзі Вілейшчыны, вучні і настаўнікі Куранецкай школы, а таксама ўсе жадаючыя, каму неабыякава творчасць К. Дубовік. У адрас паэткі прагучала шмат слоў удзячнасці, шчырасці і дабрыні.

Аддзелам абслугоўвання і інфармацыі райбібліятэкі увазе прысутных была арганізавана кніжная выстава-прагляд твораў Клаўдзіі Іванаўны “Мовай сэрца”. На фоне слайд-паказу з гісторыяй вёскі Багданава пазнаёміла старэйшы навуковы супрацоўнік Вілейскага краязнага музея Вольга Коласава. Сустрэча прайшла ў дабразычлівай, цёплай абстаноўцы.