У рамках агульнанацыянальнага праекта «Кожная пятніца – роднае, сваё» 15 мая ў Шылавіцкай сельскай бібліятэцы прайшла інтэлектуальна-дыялогавая пляцоўка «Мая Беларусь», прысвечаная таму самаму дарагому, што ёсць у чалавека, – любові да Айчыны.

Адкрываючы сустрэчу, бібліятэкар Калініна А.К. адзначыла, што сапраўдны патрыятызм будуецца з простых чалавечых каштоўнасцяў: нашых бацькоў, роднага дома, сяброў дзяцінства, любімых кніг, прыроды. Менавіта яны становяцца той глебай, на якой вырастае шчырая прыхільнасць да сваёй краіны.

У ходзе мерапрыемства юныя чытачы бібліятэкі з азартам расшыфроўвалі «Мудрыя думкі», складвалі са слоў прыказкі аб роднай зямлі. У конкурсе «Падарожжа па Беларусі» ўдзельнікі складалі спіс месцаў, якія абавязкова варта паказаць госцю краіны: ад легендарных замкаў да запаведных куткоў беларускай прыроды.

Самым кранальным момантам стала рубрыка «Прызнанне ў любові да Беларусі», дзе ўдзельнікі падбіралі прыгожыя, шчырыя вызначэнні для краіны і распавядалі, за што менавіта яны цэняць сваю Радзіму.

Завяршылася сустрэча эмацыйнай дыскусіяй «З чаго пачынаецца Радзіма?», падчас якой прысутныя ўспомнілі знакамітую песню Марка Бернеса, якая стала музычным лейтматывам мерапрыемства.