Сёння сваё 70-годдзе з дня нараджэння адзначае паэт, педагог, член ГА “Саюз пісьменнікаў Беларусі” і “Беларускі саюз музычных дзеячаў” Уладзімір Яфімавіч Цанунін.

Пісьменнік нарадзіўся 1 ліпеня 1954 года ў вёсцы Батвінаўка Крычаўскага раёна Магілёўскай вобласці ў сям’і настаўнікаў. З 1971 па 1975 гг. вучыўся на гістарычным факультэце Магілёўскага дзяржаўнага педагагічнага інстытута. У 1975-1976 гг. працаваў настаўнікам гісторыі ў Святавольскай сярэдняй школе Івацэвіцкага раёна, Сушчаўскай сярэдняй школе, а затым да 1981 г. – у Чавускай школе-інтэрнаце. У 1981 г. вярнуўся ў Крычаўскі раён, дзе спачатку працаваў у СПТВ-38 г. Крычава, а затым – у роднай Батвінаўскай школе. У 1990 г. як чарнобылец быў пераселены ў Пружанскі раён у вёску Папялёва, дзе стаў настаўнікам мясцовай школы. Летам 1995 г. быў прыняты на работу ў Беларуска-германскае дабрачыннае прадпрыемства “Надзея – ХХІ стагоддзе” на Вілейшчыне настаўнікам гісторыі. Працаваў акампаніятарам народнага калектыву аўтарскай песні “Элегія” ў Вілейцы.

Першы верш “Песня пра Крычаў” быў надрукаваны ў 1965 г. у юнацкім часопісе “Бярозка”. Аўтар некалькіх паэтычных зборнікаў: “Хто ж адкажа?”, “Неотправленные письма”, “Зачараваная чаромха”, “У струменях часу”, “Пушчанскія галасы”, “Да вогнішча далёкага юнацтва”, “Кліча бацькава хата” і іншых.

У 2016 г. быў узнагароджаны медалём “За вялікі ўклад у літаратуру”.

     Мы шчыра віншуем Уладзіміра Яфімавіча з юбілеем і жадаем яму моцнага здароўя, творчага натхнення і плённай працы!